Dagens tema var allemannsrett, og me tok til med ei økt i klasserommet med litt teori fyrst.
Målet for turen i dag var hemmeleg lenge, men undervegs på turen snakka me om innmark og utmark og såg døme på dette. Då me nærma oss målet, måtte me snakka litt om svaberg òg. Og då me etter ein kjapp spasertur i haustsola, kom til Nessetfossen, sprakk trolla, og berre jettegrytene var att i ferskvassvaberga der.
Det dukka opp mange spørsmål om korleis jettegrytene vert lagde, om dei er farlege, kvifor dei både er oppe og under vatn... Og ikkje minst; kvifor heiter det jettegryter?
I same andedraget såg me på ein steinmur på Nesset-sida i fossen som ikkje var ein steinmur likevel. Då kom me inn på litt bygdehistorie i farten. Strålande tur med nøgde og fjåge elevar rett før haustferien.